الخرطوم: سودان برس
تواصلت حرب التصريحات بين حسن برقو عضو مجلس ادارة الاتحاد السوداني لكرة القدم رئيس لجنه المنتخبات الوطنيه والمدرب الوطني محمد محي الدين “الديبة”.
وادلي الديبة بصريحات مثيرة ردا على حديث برقو والذي اوضح فيه بان الديبة مسير وهناك من يحرضه عليه وبانه يسعي للشهرة من خلال حديثه وانتقاده المتواصل له.
الديبة قال لبرقو “انا الوسط الرياضي كله بعرفني ومافي زول بيقدر يفرض على اعمل شنو واسوي شنو واي حاجة بعملها لقناعتي التامه”.
وأضاف: “انا مقتنع تماما بان برقو فاشل واخطر علينا من الكرونا” وزاد قائلا “انا من هنا ادعو للبس الكمامة والتعقيم في وجود هذا البرقو”.
وقال الديبة أن أكثر ما يثير السخرية ويؤكد بان هذا الانسان دخيل وجديد على الوسط الرياضي وجاء عن طريق الصدفة بقوله باني اسعي للشهره “.
وأضاف “يا جماعة الزول ده نصيح الكلام دا بخش عقل زول، “انا مشهور ومعروف قبل اكثر من 38 سنة واي زول بعرف الديبة، اجي اسعي للشهرة بعد الزمن دا كلو وعن طريقك انتا ؟”.
وقال الديبة ” لمن الجمهور كان بهتف وبصفق لحمد والديبة برقو كان وين ما معرف ولا عندو تاريخ ، هو البلد دي حصل فيها شنو ياخ؟ قميص محسن سيد اقدم من برقو في الوسط الرياضي.
وزاد قائلا: “لمن لبسنا شعار المنتخب الانته اسي عامل فيها رئيسو ومثلنا السودان كنت بتقطع في حطب “الكوجة” وما بتعرف الكورة مدورة ولا مربعة، وكان شفتها تشيل سكينك وتجري عليها مفتكرها بطيخة.

